Un día mui especial (monólogu)

 

Un día mui especial

 

Un amigu que yo tengo

mui dau a filosofar

entrugóme una vez esto

qu’agora te voi cuntar:

 

--De los díes de la selmana

¿cuál ye pa ti el más normal?

¿Cuál ye’l que por ordinariu

nun ye nada escepcional?

 

Yo creyí así de repente

que taba llocu’l chaval,

pero lluéu dándo-y vueltes

empecé a razonar:

 

--El sábadu y el domingu

nun se puen considerar

porque son fin de selmana,

buen momentu pa folgar.

 

La selmana tien un día

que ta xusto na metá,

ye’l xueves, y por eso

ye dignu de destacar.

 

El llunes ye’l primer día

que se entama a trabayar,

y el vienres ye yá’l caberu

con xornada llaboral.

 

Ta ente’l llunes y el vienres

el miércoles, claro ta;

eso fai que formen ellos

un tríu particular.

 

Con esti razonamientu

seis díes hai que quitar

por tener dalgún detalle

que los permite brillar.

 

Entós de la llista queda

Solo’l martes sin tachar,

asina qu’esi ye’l día

que me pidisti buscar.

 

El mio amigu que tol tiempu

m’escuchó ensin gorgutar,

mirándome sonriente

retrucóme mui cabal:

 

--Si de siete solo hai unu

Que nun tien de qué fardar

Ye precisamente éso

Lo que lu fai especial.

 

--Tienes razón –díxe yo--,

lo que dices ye verdá,

que los díes unu a unu

los tenemos qu’apreciar.

 

Quedamos entós en venos

otru día p’analizar

cuál de los meses del añu

yera’l más orixinal.

 

Pero esa ye otra historia

qu’agora nun voi cuntar,

porque dempués d’esti versu

yá llegamos al final.

 

-----ooo---

 

E. d’And. Marzu de 2023

Actividaes corales (monólogu)

 

Actividaes corales

 

Si vas metete nun coru

porque te gusta cantar,

atiendi a lo que te digo

pa que nun te vaya mal.

 

Ye útil saber solfeo,

anque non lo principal;

pero tener bona oreya,

eso ye fundamental.

 

Divídese’l coru en cuerdes,

en cuatro y a veces más,

que n’orde d’agudo a grave

voite agora a enumerar:

 

Primero tan les sopranos,

les contraltos van detrás,

siguen dempués los tenores

y los baxos al final.

 

De toles cuerdes que dixe

la que a ti meyor te va

díztela esi que ye

director de la coral.

 

Atentos, atentos toos,

que l’ensayu va empezar;

primero cuerda por cuerda

pa saber bien afinar.

 

Dempués cantamos toos xuntos;

nun t’olvides de mirar

al director que ta enfrente

pa podenos coordinar.

 

Si abre muncho los brazos

hai que dar intensidá,

y cuando cierra los deos

ye’l momentu de parar.

 

Dempués d’ensayar un canciu

prepárense varios más

pa facer cuando convenga

un conciertu musical.

 

En llegando esi momentu

nel que tengamos qu’actuar

taremos mui concentraos

pa nun nos equivocar.

 

Actuaremos nun teatru

o na ilesia parroquial,

enriba d’una tarima

o xubíos al altar.

 

El públicu tará enfrente

dispuestu pa disfrutar

del conciertu polifónicu

que tamos a puntu dar.

 

Con un diapasón d’oreya

o d’esos qu’hai que soplar,

daranos el dire’l tonu

col que vamos entamar.

 

Y cuando alce les manes

marcándonos el compás,

procuraremos dir xuntos

sin que naide quede atrás.

 

Si empezamos a la vez

y paramos al empar,

anque pol mediu piciemos

naide lo va notar.

 

Si yá acabáu’l conciertu

la xente pidiere más,

habría que facer un bis

pa podélu rematar.

 

Dempués d’acabáu’l conciertu

querrémoslo comentar

delantre un culín de sidra

y unes tapes pa picar.

 

Y llueu diremos pa casa

con ganes de descansar,

que como tol mundu sabe

mañana hai que madrugar.

 

E d’And. Marzu 2023